जर्जिया ।
अमेरिकाको जर्जिया स्थित ग्विनेट काउन्टी प्रहरी विभाग का युवा प्रहरी अधिकारी प्रदीप तामाङ (२५) को ड्युटीका क्रममा गम्भीर घाइते भई उपचारका क्रममा निधन भएको छ। प्रहरी प्रमुख अनुसार घटनापछि उनलाई तत्काल Northside Hospital पुर्याइएको थियो, जहाँ चिकित्सकहरूको प्रयासका बाबजुद उनको ज्यान बचाउन सकिएन।
प्रदीप तामाङ एक वर्षभन्दा कम समयअघि मात्र ग्विनेट काउन्टी प्रहरी विभाग मा आबद्ध भएका थिए। उनले गत वसन्त ऋतुमा प्रहरी सेवामा प्रवेश गरेका थिए र छोटो समयमै आफ्नो कर्तव्यनिष्ठा, अनुशासन र समर्पणका कारण सहकर्मीहरूबीच सम्मानित बनेका थिए।
प्रहरी विभागका अनुसार तामाङ भुटानका नागरिक हुन्। करिब १० वर्षअघि अमेरिका आएका उनी उच्च सपना र जिम्मेवारीको भावनासहित सार्वजनिक सुरक्षाको सेवामा समर्पित भएका थिए। नयाँ देशमा आफ्नो भविष्य निर्माण गर्दै समुदायको सुरक्षामा योगदान दिने उनको लक्ष्य प्रहरी सेवामार्फत पूरा हुँदै थियो।
तामाङ हालै इन्गेज्डमेन्ड भएका थिए र पारिवारिक जीवन सुरु गर्ने तयारीमा थिए। उनको असामयिक निधनको खबरले परिवार, आफन्त, साथीभाइ तथा प्रहरी विभागलाई गहिरो शोकमा डुबाएको छ। प्रहरीका अनुसार उनको परिवार हाल पेन्सिल्भेनियाबाट जर्जिया तर्फ यात्रा गरिरहेको छ।
प्रहरी विभागले तामाङलाई कर्तव्यप्रति इमानदार, जिम्मेवार र साहसी अधिकारीका रूपमा स्मरण गरेको छ। ड्युटीका क्रममा आफ्नो ज्यान जोखिममा राख्दै समुदायको सुरक्षाका लागि खटिनु उनका लागि केवल पेशा नभई सेवा र कर्तव्यको विषय रहेको सहकर्मीहरूले बताएका छन्।
उनको निधनले केवल एक प्रहरी अधिकारी मात्र होइन, एक होनहार युवा, परिवारको आशा र समुदायको भरोसा गुमेको प्रहरी विभागले जनाएको छ। यस घटनाले प्रहरी सेवाको जोखिमपूर्ण यथार्थ र शान्ति तथा सुरक्षाका लागि अधिकारीहरूले गर्ने त्यागलाई पुनः स्मरण गराएको छ।
ग्विनेट काउन्टी प्रहरी विभाग ले शोक सन्तप्त परिवारप्रति गहिरो समवेदना व्यक्त गर्दै तामाङको सेवा र बलिदानलाई सधैं सम्झिरहने जनाएको छ। समुदायका विभिन्न संघसंस्था र व्यक्तिहरूले पनि सामाजिक सञ्जालमार्फत श्रद्धाञ्जली अर्पण गर्दै परिवारप्रति सहानुभूति व्यक्त गरेका छन्।
