भुटानका पूर्व राजनीतिक बन्दीलाई राहत: सहयोग अभियानबाट संकलित रकम हस्तान्तरण

बेलडाँगी, झापा — सार्वजनिक सहयोग अभियानमार्फत संकलित रु १,१५,८४४.६८ (एक लाख पन्ध्र हजार आठ सय चवालीस रुपैयाँ अठ्सट्ठी पैसा) रामबहादुर राईलाई हस्तान्तरण गरिएको छ। ६६ वर्षीय उनी भुटानका पूर्व राजनीतिक बन्दी हुन् र हाल बेलडाँगी शरणार्थी शिविरमा अत्यन्त कठिन अवस्थामाि जीवनयापन गरिरहेका छन्। Global Campaign for the Release of Bhutanese Political Prisonersद्वारा १३ जनवरी २०२६ मा सुरु गरिएको उक्त अभियान १५ फेब्रुअरी २०२६ मा सम्पन्न भएको थियो।

उक्त रकम बेलडाँगी क्याम्पका सचिव सञ्चाहाङ सुब्बाले श्री राईको सानो कुटीमा आयोजित एक सानो कार्यक्रममा औपचारिक रूपमा हस्तान्तरण गर्नुभयो। कार्यक्रममा पूर्व राजनीतिक बन्दी मधुकर मोंगर र दिलकुमार राई, चमगाङस्थित राजनीतिक बन्दी ओमनाथ अधिकारीकी आमा श्रीमती डम्बरकुमारी अधिकारी तथा काठमाडौंबाट वरिष्ठ पत्रकार देवेन्द्र भट्टराईलगायतको उपस्थिति रहेको थियो।

अभियानका संस्थापक राम कार्कीले सहयोगी तथा दाताप्रति हार्दिक कृतज्ञता व्यक्त गर्दै यस्तो मानवीय सहयोगले आर्थिक राहत मात्र होइन, पूर्व राजनीतिक बन्दीहरूले भोगेका पीडाको सम्मान र निरन्तर ऐक्यबद्धताको सन्देश पनि दिने बताउनुभयो।

श्री राई भुटानबाट १९९० को दशकको प्रारम्भमा जबर्जस्ती विस्थापित गरिएका नेपालीभाषी ल्होत्साम्पा समुदायका सदस्य हुन्। सन् १९९४ मा विस्थापित नागरिकहरूको स्वदेश फिर्ती अधिकारका लागि शान्तिपूर्ण वकालत गर्न उनी भुटान फर्किएका थिए। राजनीतिक पर्चा वितरण गरिरहेकै क्रममा उनलाई भुटानको राष्ट्रिय सुरक्षा ऐन अन्तर्गत पक्राउ गरियो, कानुनी प्रतिनिधित्वबिना मुद्दा चलाइयो, बनावटी आरोपमा दोषी ठहर गरियो र ३१ वर्ष १० महिनाको कैद सजाय सुनाइयो।

झण्डै ३२ वर्षसम्म चमगाङ केन्द्रीय कारागारमा बन्दी जीवन बिताउँदा उनले कठोर यातना, दीर्घ कुपोषण, स्वास्थ्य सेवाबाट वञ्चितता र अमानवीय कारागार अवस्थाहरू सहनुपर्‍यो, जसले उनको स्वास्थ्यमा गम्भीर र दीर्घकालीन असर पारेको छ। ५ जुलाई २०२४ मा रिहा भएपछि उनलाई तत्कालै भुटानबाट निष्कासन गरियो र ७ जुलाई २०२४ मा बेलडाँगी शरणार्थी शिविरमा आइपुगे। हाल उनी परिवारको साथ, आम्दानी वा कानुनी कागजातबिनै सानो कुटीमा एक्लै बसोबास गरिरहेका छन्।

दीर्घ कारावास र उपचारविहीन रोगका कारण श्री राई गम्भीर स्वास्थ्य समस्याबाट पीडित छन्। उनलाई तुरुन्त स्वास्थ्य परीक्षण, उपचार, औषधि तथा निरन्तर निगरानी आवश्यक छ। शरणार्थी दर्ता वा परिचयपत्र नहुँदा उनी नेपालमा उपलब्ध आधारभूत स्वास्थ्य सेवा तथा मानवीय सहयोगबाट समेत वञ्चित छन्।

आयोजकहरूले मानवअधिकार संस्था, सरोकारवाला तथा सर्वसाधारण सबैलाई श्री रामबहादुर राईलाई यस कठिन घडीमा निरन्तर सहयोग गर्न अपिल गरेका छन्, ताकि उनको सम्मान, स्वास्थ्य र आधारभूत जीवनयापन सुनिश्चित हुन सकोस्।