98 पटक हेरिएको 
क्यानडाको ब्रिटिश कोलम्बिया प्रान्तस्थित टम्ब्लर रिज क्षेत्रका एक विद्यालय र त्यसको आसपास भएको भीषण गोलीकाण्डमा कम्तीमा १० जनाको ज्यान गएको पुष्टि प्रहरीले गरेको छ। घटनामा परी २५ भन्दा बढी व्यक्ति घाइते भएको बताइएको छ, जसको विभिन्न अस्पतालमा उपचार भइरहेको छ।
प्रहरीका अनुसार टम्ब्लर रिज सेकन्डरी स्कूलको भवनभित्रै छ जनालाई मृत अवस्थामा फेला पारिएको थियो। गम्भीर घाइते अवस्थामा उद्धार गरिएका अर्का एक व्यक्तिको अस्पताल लैजाँदै गर्दा बाटोमै मृत्यु भएको जनाएको छ। घटनास्थलमै आक्रमणमा संलग्न भएको आशंका गरिएको व्यक्तिको शव पनि भेटिएको छ र उनले आत्महत्या गरेको प्रारम्भिक निष्कर्ष अधिकारीहरूले सार्वजनिक गरेका छन्।
यसैबीच विद्यालय नजिकै रहेको एउटा घरमा थप दुई जनाको शव फेला परेको छ। प्रहरीको भनाइ अनुसार ती दुई जनाको मृत्यु पनि सोही घटनासँग सम्बन्धित हुन सक्ने प्रारम्भिक अनुमान गरिएको छ। यद्यपि मृतकहरूको पहिचान औपचारिक रूपमा सार्वजनिक गरिएको छैन।
घटनाको सुरुवाती जानकारीमा सन्दिग्ध आक्रमणकारी महिला हुन सक्ने संकेत प्राप्त भए पनि आधिकारिक रूपमा उमेर, लिङ्ग वा परिचय खुलाइएको छैन। सुरक्षाकर्मीहरूले विस्तृत अनुसन्धान जारी रहेको र घटनाको पृष्ठभूमि तथा उद्देश्यबारे थप तथ्य संकलन भइरहेको बताएका छन्।
यस दुःखद घटनापछि क्यानडाका प्रधानमन्त्री मार्क कार्नीले आफ्नो निर्धारित जर्मनी भ्रमण स्थगित गर्दै पीडित परिवारप्रति समवेदना व्यक्त गरेका छन्।
