601 पटक हेरिएको 
अमेरिका/अमेरिकाको फ्लोरिडामा भारतीय मूलकी एक बालरोग विशेषज्ञ आमाले आफ्नै छोरीलाई बाथटबमा डुबाएर हत्या गरेको आरोप लागेको छ। प्रहरीले दिएको जानकारीअनुसार, आमा–छोरीबीच विवाद भएको केही समयपछि छोरीलाई नुहाउने क्रममा जबरजस्ती बाथटबमा राखेर डुबाएको र त्यसपछि घटनालाई दुर्घटनाको रूप दिन आमाले ‘छोरी चिप्लिएर बाथटबमा डुबिन’ भन्दै आपतकालीन सेवा ९११ मा कल गरेकी थिइन्।
तर अनुसन्धानमा आमाकै छोराले दिएको बयानले घटना दुर्घटना नभई योजनाबद्ध हत्या भएको संकेत गरेको प्रहरीको भनाइ छ। मेडिकल रिपोर्टले पनि छोरीको शरीरमा चोटपटकको चिन्ह र डुबेका कारण मृत्यु भएको पुष्टि गरेको छ। प्रहरीले आमालाई पक्राउ गरी हत्या अभियोगमा मुद्दा दायर गरेको छ।
प्रहरीका अनुसार, घटना प्रस्ट्याउन आमाले बनाएको नाटकले धेरैलाई झुक्याउने प्रयास गरे पनि घटनास्थल, साक्षीको बयान र पोस्टमार्टम रिपोर्टले वास्तविकता उजागर गरेको हो। अहिले आमालाई पहिलो डिग्री हत्याको अभियोगमा अदालतमा पेश गरिएको छ र मुद्दाको कानुनी प्रक्रिया अघि बढिरहेको छ।
