ह्यारिसबर्ग, पेंसिल्भेनिया – ह्यारिसबर्ग प्रिमियर लिग क्रिकेट (एचपीएल) यस वर्ष फेरि आयोजना हुन लागेको छ। क्रियमाण फाउण्डेशनकोआयोजनामा एचपीएल अप्रिलदेखि अगस्टसम्म सञ्चालन हुने भएको छ।
फाउण्डेशनद्वारा जारी नयाँ प्रेस विज्ञप्तिमा भनिएको छ कि एचपीएललेस्थानीय खेलाडीहरूलाई आफ्नो प्रतिभा देखाउने सुनौलो अवसर प्रदान गर्नेछ र नयाँ युवा खेलाडीहरूलाई विकास गर्ने उद्देश्य राख्दछ।
यस वर्ष ९४ जना खेलाडी सहभागी हुनेछन्, जसले चार टिममा प्रतिस्पर्धा गर्नेछन्: सस्केहाना टाइटन्स, लिबर्टी वारियर्स, ह्यारिसबर्ग थन्डरहक्स, र क्यापिटल स्ट्राइकर्स।
एचपीएल हार्ड टेनिस बल प्रयोग गर्ने, १५ ओभरको लिग हो, जसले खेलाडीहरूको कौशल, रणनीति, र प्रतिस्पर्धात्मक अनुभवलाई समृद्ध बनाउनेछ।
एचपीएललाई यस वर्ष पनि गोल्डेन होम केयरले प्रायोजन गरेको छ। लिगह्यारिसबर्ग क्रिकेट एलायन्ससँगको सहकार्यमा सञ्चालन हुनेछ।
क्रियमाण फाउण्डेशनका मुख्य कार्यकारी अधिकृत र अध्यक्ष भरत तिम्सिनाले विज्ञप्तिमा भने:
“ह्यारिसबर्ग प्रिमियर लिगले स्थानीय खेलकुद प्रवर्द्धन गर्न, युवा क्रिकेट खेलाडीहरूलाई अवसर दिन, र समुदायभित्र एकता ल्याउन केन्द्रित हुनेछ।”
लिगका सबै खेलहरू लिट्ल पार्कको क्रिकेट मैदानमा हुनेछन्। खेल तालिका ह्यारिसबर्ग प्रिमियर लिगको फेसबुक पेजमा हेर्न सकिन्छ।
ड्राफ्ट डे यस वर्ष ५ अप्रिल, आईतवार, दिउँसो ४ बजे आयोजना गरिनेछ। कार्यक्रम सामाज टाइम्समार्फत प्रत्यक्ष प्रसारण हुनेछ। यस अवसरमा धेरैसामुदायिक नेतृत्व प्रतिनिधिहरूलाई निमन्त्रणा गरिएको छ, जसले खेलाडीहरूलाई ड्राफ्ट गर्ने, लिगको उद्देश्य तथा दृष्टिकोणमा समर्थन जनाउने, र समानताको सन्देश प्रवर्द्धन गर्ने अवसर पाउनेछन्।
ड्राफ्ट डे कार्यक्रममा समुदायमा आत्महत्यासम्बन्धी समस्या तथा मानसिक स्वास्थ्यको वर्तमान अवस्था विषयमा विशेष वक्तव्य प्रस्तुत गरिनेछ। उक्त वक्तव्य #PlayForLife पहल अन्तर्गत लीला चम्लागाईं (सार्वजनिक स्वास्थ्य कार्यक्रम निर्देशक) ले दिनेछन्।खेलाडीहरूले ड्राफ्ट डेमा आफ्नो टोली पत्ता लगाउनेछन् र कार्यक्रममा सहभागी भई उत्सव मनाउनेछन्।
एचपीएल केवल क्रिकेट प्रतियोगिता मात्र होइन; यो समुदाय-केन्द्रित क्रिकेट लिग हो जसले:
• क्रिकेटप्रतिको प्रेममार्फत समुदायलाई एकत्रित गर्दछ।
• सकारात्मक सामाजिक प्रभाव र समुदाय भावना प्रवर्द्धन गर्दछ।
• युवा खेलाडीहरूको प्रतिभा विकासमा योगदान पुर्याउँछ।
• मानसिक स्वास्थ्यबारे सचेतना फैलाउँछ, विशेषगरी डिप्रेशन र आत्महत्यासम्बन्धी मुद्दाहरूमा समर्थन जुटाउन।
हाम्रो #PlayForLife पहल मार्फत, हामी 988 लाई 911 जस्तै सजिलै पहुँचयोग्य र लोकप्रिय बनाउन चाहन्छौं।
ह्यारिसबर्ग प्रिमियर लिग २०२६ – जहाँ खेल, प्रतिभा, र समुदाय एकसाथ मिसिन्छन्।
