फेयरफिल्ड, ओहायो — अमेरिकाको ओहायो राज्यस्थित फेयरफिल्डमा रहेको नेपाली स्वामित्वको ‘एभरेस्ट ज्वेलर्स’ मा भएको लुटपाट तथा हत्या प्रकरणमा संलग्न मुख्य संदिग्धमध्ये एक जनालाई प्रहरीले पक्राउ गरेको छ भने अर्का एक जना अझै फरार रहेका छन्। फेयरफिल्ड प्रहरी विभागले एक प्रेस विज्ञप्ति जारी गर्दै घटनाको पछिल्लो अनुसन्धान प्रगतिबारे जानकारी दिएको हो।
प्रहरीका अनुसार गत अक्टोबर २०, २०२६ को दिउँसो १:०० बजेभन्दा केही समयअघि दुई व्यक्ति गहना खरिद गर्ने बहानामा एभरेस्ट ज्वेलर्समा प्रवेश गरेका थिए। पसलका सञ्चालक तारा सिन्चुरीसँग कुराकानी गर्ने क्रममा उनीहरूले एक्कासि हतियार निकालेका थिए। सोही क्रममा भएको घम्साघम्सीमा सञ्चालक सिन्चुरीको ज्यान गएको थियो। घटनालगत्तै ती व्यक्तिहरू पसलबाट बहुमूल्य सामानहरू लुटेर फरार भएका थिए।
घटनाको सूचना पाएलगत्तै फेयरफिल्ड प्रहरीका अनुसन्धानकर्ताहरूले विभागको ‘फ्लक अटोमेटेड लाइसेन्स प्लेट रिडर’ (ALPR) प्रणालीको मद्दतले संदिग्धहरूले प्रयोग गरेको सवारी साधनको पहिचान गरेका थिए। उक्त सुराक र पसलको सिसिटिभी (CCTV) फुटेजको विश्लेषणका आधारमा प्रहरीले दुई संदिग्धको पहिचान गरी उनीहरूविरुद्ध पक्राउ पुर्जी जारी गरेको थियो।
सोही क्रममा गत नोभेम्बर ४, २०२६ मा फेयरफिल्ड प्रहरीको टोली न्युयोर्क सहर पुगेको थियो। युनाइटेड स्टेट्स मार्सल्स सर्भिसको सहयोगमा प्रहरीले एक संदिग्ध कार्लोस इड्रोगो-एरियास (Carlos Idrogo-Arias) लाई न्युयोर्कबाट पक्राउ गर्न सफल भएको छ। हाल उनलाई ओहायो सुपुर्दगी गर्ने प्रक्रियाका लागि न्युयोर्कमै हिरासतमा राखिएको छ।
प्रहरीका अनुसार यस घटनाका अर्का संदिग्ध रिचर्ड गुजमान-गुजमान (Richard Guzman-Guzman) अझै फरार छन्। उनी हाल न्युयोर्क वा न्युजर्सी क्षेत्रमै लुकिछिपी बसेको हुनसक्ने प्रहरीको अनुमान छ।
प्रहरीले गुजमान-गुजमान हतियारधारी र अत्यन्तै खतरनाक हुनसक्ने भन्दै सर्वसाधारणलाई उनको नजिक नजान आग्रह गरेको छ। उनलाई कतै देखेमा वा उनको बारेमा कुनै जानकारी भएमा तुरुन्तै नजिकको प्रहरी निकाय वा फेयरफिल्ड प्रहरी विभागमा खबर गर्न अनुरोध गरिएको छ।
फेयरफिल्ड प्रहरी प्रमुख स्टेफेन बी. मेनार्डले यस जटिल अनुसन्धानमा सहयोग पुर्याउने संघीय अनुसन्धान ब्युरो (FBI), होमल्यान्ड सेक्युरिटी इन्भेस्टिगेसन्स (HSI), ब्युरो अफ अल्कोहल, टोबाको, फायरआर्म्स एन्ड एक्सप्लोसिभ्स (ATF) तथा युनाइटेड स्टेट्स मार्सल्स सर्भिसप्रति विशेष आभार व्यक्त गरेका छन्। यति ठुलो स्तरको अपराध अनुसन्धानका लागि उच्च स्रोत र समन्वय आवश्यक पर्ने उल्लेख गर्दै उनले दोषीलाई कानुनी दायरामा ल्याउन संघीय निकायहरूले देखाएको प्रतिबद्धताको प्रशंसा गरेका छन्।
